بينما أنت تمشى فى الشارع متأملا فى حياتك وطموحات ومستقبلك فإذا باحساس من الشك والقلق وعدم الأمان يتسرب إلى قلبك
هل هى دى الوظيفة اللى كنت بحلم بيها ؟ هل العلاقة العاطفية دى هتحققلى السعادة ؟ ياترى فيه أمل أحسن بيه المستوى المادى ؟ طب انا خايف ومش عارف أنا هدفى ايه فى الحياة ؟
الأسئلة اللى فاتوا دول ملخص لحاجة اسمها أزمة ربع العمر واللى اتكلم عنها عالم الطبيب النفسى اليكس فوك وقال انها فترة من الشك وانعدام الثقة وخيبة الأمل حول حياتك العاطفية والعلاقات ووضعك المالى
وفقا لاحصائية تمت على موقع لينكد إن 75 % من الشباب اللى أعمارهم من 25 - 35 سنة بيعانوا من أزمة ربع العمر وعلى فكرة النساء مهم الأكثر عرضة للتعرض للأزمة
- طيب بتحصل ليه ؟ بص ياسيدى أولا النقلة من مرحلة الكلية لما بعد التخرج وتحولك لشخص مسئول عن حياتك ومستقبلك والتخطيط ليه فيهم كم هائل من الضغط النفسى والعصبى طبعا دا فى ظل صعوبة ايجاد فرص عمل أصلا
- التوقعات العالية فى فترة الكلية بالوظيفة المميزة وعلاقة الحب الأفلاطونية والدخل اللامنتهى بيصطدم بالواقع المرير ويالها من مفاجأة
- المقارنات بينك وبين ناس فى نفس المرحلة العمرية حققوا حاجات بالنسبة ليك نجاحات وأنت لسه مكانك
لو وصلت معايا للمرحلة دى فشكرا لصبرك ومتقللقش هنتكلم ع العلاج حالا.....
- متحطش نفسك فى مقارنة مع حد عشان مفيش معايير ثابتة للنجاح ف مش شرط إطلاقا ارتباط السعادة والشعور بالرضا بهدف بعينه ممكن توصل لحاجة كنت بتتمناها ومتبقاش سعيد .
- لو حاسس إنك متلخبط ومش عارف أنت عايز ايه اقعد مع نفسك وفكر مشكلتك فين الشغل ؟ علاقة عاطفية حالة مادية ؟ مش عارف بتحب ايه ؟ أصل نص حل المشكلة إنك تعرفها .
- اتكلم مع صحابك غالبا إحنا بنتكلم عن اللى متأكدين منه جرب اتكلم عن اللى بيقلقك عن اللى أنت خايف منه يمكن تلاقى الدعم الحل ...
- كفاية جلد ذات أرجوك آه وربنا براحه كده على نفسك أصل كل حاجة فى الدنيا بتيجى ف وقتها اعمل اللى عليك واجتهد وكافئ نفسك على مجهودك وإن شاء الله هتوصل .... تفائل 😉
Comments
Post a Comment