أنا محدش بيحبنى ليه ؟!
قاعد بائس وحيد بتقلب فى الفيسبوك وبتدور على الولاحاجة ...مستنى حد يهتم بيك ويحبك ويسمع تفاصيل يومك من غير مايكون زهقان....محتاج حد يحبك ....عمرك سألت نفسك أنت ليه محتاج حد يحبك ؟
فى جملة كده بتقول " Great things always begin from the inside"
..يعنى إيه ؟ أنت مش بتحب نفسك كفاية مش شايف نفسك كويس أو مميز قوم تعمل ايه بقى تحاول تجيب ده من بره من الناس اللى حواليك وتلاقى نفسك طول الوقت بتطارد الحاجات اللى ناقصة دى فى صورة كلمات أشخاص مستنى إنهم يملوا الفراغ ده.
يعنى منحبش حد ؟ لا طبعا بس لازم تبقى فاهم إن فيه حاجة اسمها الحب غير المشروط يعنى أنت بتحب وبتدى عشان المقابل اللى هتأخده ؟؟ ولا أنت احساس العطاء ده بيبسطك ومش بتدور ع النتيجة يعنى الحب بالنسبة ليك غاية مش وسيلة !
ليه قولنا الكلام اللى فات ده عشان اللى بيخرج فى العلاقة ده انعكاس اللى جوالك ... يعنى لو أنت شايف نفسك حد فاشل مثلا فأنت داخل علاقة عشان تسمع تأكيدات طول الوقت إنك جامد ولطيف وناجح أنت داخل تكمل اللى ناقصك داخل تأخد حاجة معينة من وسط حاجات كثيرة ...شريكك هيقدملك الدعم ويساعدك بس أنت لازم تحل مشاكلك الداخلية وتحب نفسك كفاية وتهتم بيها ولما تغلط يكون حديثك الذاتى لطيف لأن اللى جواك هواللى بيخرج فى كل تعاملاتك .
الموضوع مستمر فى الزمن يعنى مش هنقول خلاص انا بقيت بحب نفسى شكرا كده بقيت كويس ....دى حاجة بتأخد وقت طويل خلى حواليك ناس تدعمك معنويا خلى بالك من كلامك مع نفسك وخبى كرباج جلد الذات ...وفى النهاية حب نفسك حتى تعرف تحب من حولك
Comments
Post a Comment