الموضوع بيبتدى من واحنا صغيرين ... بابا أنا رسمت إيه رأيك ف رسمتى .... بابا أنا جبت 10 من 10 النهاردة .... غالبا بنبقى محتاجين نسمع بعدها كلمة برافو شاطر معظمنا بيتخيل إن ده مربوط بفترة الطفولة أو مرحلة سنية معينة وبينتهى لما بنكبر، لكن يمكن أكثر ناس ممكن يكونوا محتاجين يحسوا بالتقديرده هما الكبار مش الصغيرين .... كلمة تقدير بسيطة بتخلى موظف يطلع أحسن ماعندى ف الشغل وكلمة ثانية تخليه يقول الجملة الأشهر ف تاريخ الموظفين " هشتغل على قد فلوسهم " ، اللى بيتمرن ف جيم وبيشيل وزن جديد بيبقى مهتم إن الكابتن بتاعه يشوف التطورده عشان يسمع عااااااش ، هو نفس المشهد اللى حصل وصغيرين بيتكرر وحنا كبار بس مع أشخاص مختلفة ، مراتك ممكن تتخانق معاك لمجرد إنك كلت وخلصت من غير ما تقولها شكرا تسلم ايدك الأكل حلو مع إنها حاجة ممكن تكون عملتها كذا مرة قبل كده مفيش حاجة جديدة بس هى محتاجة تحس ان تعبها اتقدر، الخلاصة إن الاحتياج للتقدير ملوش سن ولا وقت كلام بسيط تأثيره كبيرمش هيخسرك حاجة بالعكس ده ممكن يصلح علاقات كثير 😊
Comments
Post a Comment